Wêreldrekord van R7,575 miljoen vir Irma Stern-skildery

May 28, 2010   [ Archived ]

Personneel Verslaggewer - Die Beeld

'n Nuwe wêreldrekordprys vir 'n Irma Stern-skildery is Maandagaand in Johannesburg behaal toe R7,575 miljoen op Strauss & Kie. se kunsveiling vir haar olieverfskildery van 1934, Stillewe met gladioli en vrugte, betaal is.

Dit is die hoogste prys wat ’n Suid-Afrikaanse stillewe nog behaal het en is R425 000 meer as wat betaal is vir Stern se Magnolias in ’n erdepot, wat begin verlede jaar vir R7,15 miljoen op Strauss & Kie. se eerste veiling verkoop is.

Drie ander Stern-skilderye in olieverf het Maandag ook besonder hoë pryse op die veiling behaal. Stillewe met magnolias en pampoene (ongedateer) is vir R6,127 miljoen verkoop, Stillewe met dahlias en vrugte (1960) vir R4 233 200, en Stillewe met proteas in ’n pot (1946) vir R3,899 miljoen.

Kenmerkend van die veiling was die hoë pryse wat ook vir die werke van ander Suid-Afrikaanse kunstenaars behaal is. Vir Alexis Preller se Die blomkoning (1970) is R2 896 400 betaal, en vir Cecil Skotnes se Afrikaan-figure (1965) R2 005 200. Maud Sumner se natuurtoneel in Skotland by ’n meer, Paysage Ecossais, is vir R1 448 200 verkoop.

Die veiling is deur sowat 200 mense bygewoon en het altesame R40,4 miljoen geïn. Mnr. Stephan Welz, die afslaer en besturende direkteur van die afslaersfirma, het ná die veiling gesê: “Veilingsuitslae soos hierdie bewys dat selfs gedurende ’n ekonomiese insinking topgehalte kunswerke hoë pryse behaal.”

Strauss & Kie. het vanjaar reeds nagenoeg R80 miljoen op sy kuns- en oudhede-veilings behaal. Nog twee sulke veilings word later vanjaar aangebied. Dit gee ’n goeie aanduiding dat met die wisselvalligheid van die aandelebeurs en ’n onsekere ekonomie aan die orde van die dag, beleggers toenemend waarde aan antieke ware en die skone kunste heg.

Gepubliseerd deur Die Beeld